Roma yangi hujumchini izlayapti: Tresoldi bilan muzokara

Roma hujum chizig‘ini qayta chizishga kirishdi. Gian Piero Gasperini qo‘l ostidagi yangi loyiha uchun klub old chiziqqa yangi nafas izlayapti.

Yoz boshida radar markazida bo‘lgan Mason Greenwood va Crysencio Summerville bo‘yicha muzokaralar boshi berk ko‘chaga kirib qolgach, yo‘nalish keskin o‘zgardi. Endi diqqat markazida — Club Brugge hujumchisi Nicolo Tresoldi.

Gasperiniga mos profil

Yosh nemis hujumchisi — Gasperini uchun aynan kerakli tip. Harakat radiusi keng, pressingda ishlaydi, tezkor qaror qabul qiladi. Shuning uchun ham u Roma ro‘yxatida oddiy nom emas, balki ustiga chizilgan asosiy nishonlardan biri.

Il Tempo jurnalistlari Filippo Biafora va Lorenzo Pes ma’lumotiga ko‘ra, Roma allaqachon Club Brugge bilan bevosita muzokara olib bormoqda. Gap quruq qiziqish darajasida emas, stol ustida real variant turibdi.

Tresoldi tanlovini qildi, lekin…

Eng muhim nuqta shuki, Tresoldi o‘zi allaqachon qarorini bildirgan: u Italiyaga, xususan Roma safida o‘ynashni istaydi. Hujumchi uchun bu qadam nafaqat sportiy sakrash, balki Gasperini qo‘l ostida o‘sish imkoniyati sifatida ko‘rinmoqda.

Ammo bitta to‘siq bor. Club Brugge moliyaviy masalada qat’iy turibdi. Belgiyaliklar hali ham yuqori miqdordagi talabdan voz kechgani yo‘q, bu esa Roma rahbariyatini muzokara stolida ancha nozik o‘yin o‘ynashga majbur qilmoqda.

Roma uchun savol endi bitta: Gasperini xohlayotgan hujumchini olib kelish uchun ular bu narxga qanchalik yaqinlasha oladi — yoki yozgi bozor yakuniga qadar yana bir nishonni qo‘ldan chiqarish xavfi bilan yuzma-yuz qoladimi?