UFC Abu Dhabi: jangchilar kechasi va kutilayotgan to‘qnashuvlar
Shanba kuni Abu Dhabi’dagi Etihad Arena oktagoni atrofida issiq nafas oladi. Karta — 13 ta jang. Har biri o‘zicha hikoya, o‘zicha xavf. Keling, ularning eng muhimlariga birma-bir nazar tashlaymiz.
Magomed Ankalaev – Bogdan Guskov: sobiq chempionning qaytishi
Yengil og‘ir vazn toifasida Magomed Ankalaev nihoyat kamarni Aleks Pereira’ga boy berganidan keyingi ilk safar oktagonga qaytadi. Raqib — qisqa ogohlantirishda jangni qabul qilgan Bogdan Guskov, jarohat olgan Khalil Rountree Jr. o‘rnini egallagan jangchi.
Bu yerda farq ko‘zga tashlanib turibdi: Ankalaev tajribaliroq, texnik jihatdan to‘liqroq, besh raundlik jangga to‘liq tayyorlab kelgan. Guskov esa imkoniyatni qo‘ldan boy bermaslikka urinadigan xavfli o‘ng qo‘l. Ammo uzoq masofa, to‘liq lager o‘tagan favorit va taktika — bularning bari Ankalaev tomonida.
Kutilayotgan manzara aniq: Ankalaev raqibini “chuqur suv”ga tortadi, bosimni raunddan raundga oshiradi va o‘rta raundlarda zarbalar bilan ishni yakunlaydi.
Taxmin: Magomed Ankalaev – texnik nokaut (TKO)
Steve Erceg – Ramazan Temirov: vazn yengil, mas’uliyat og‘ir
Pashsha vaznida ikki yuqori darajadagi jangchi to‘qnashadi. Steve Erceg va Ramazan Temirov o‘rtasidagi jang kartadagi eng texnik to‘qnashuvlardan biri bo‘lishi kutilmoqda.
Bu juftlikning uslublari bir-biriga yomon tushmaydi: tezlik, kombinatsiyalar, har bir xato uchun jazolashga tayyor bo‘lgan ikki jangchi. Bu yerda erta yakun emas, hakamlar qarori ko‘rinib turibdi. Mayda tafsilotlar hal qiladi: kim bosimni barqaror ushlab turadi, kim xatoni kam qiladi, kim oxirgi daqiqalarda ham tempni tushirmaydi.
So‘nggi natijalar, sur’at va ruhiy ko‘tarinkilik bo‘yicha Temirov biroz oldinda. Shu ustunlik hal qiluvchi bo‘lishi mumkin.
Taxmin: Ramazan Temirov – hakamlar qarori bilan g‘alaba
Islam Dulatov – Wellington Turman: matchmakingning ochiq xati
Yarim o‘rta vazn. Islam Dulatov uchun bu jang deyarli manifest. Unga qarshi qo‘yilgan Wellington Turman — tajribali, lekin bu toifa uchun ayni paytda noqulay juftlik emas.
Bu juftlikka qarab, promouterlarning niyati yashirin emas: Dulatovning nomini balandroq darajada yangratish. Kuch, zarba quvvati, ishtiyoq — barchasi Dulatov tomonda. Turman esa raqib bosimiga dosh berishi juda qiyin bo‘ladigan kecha kutmoqda.
Bu yerda uzoq strategiya emas, erta portlash kutiladi. Dulatov bosimni dastlabki daqiqalardanoq oshirsa, birinchi raunddayoq yakun bo‘lishi ehtimoli katta.
Taxmin: Islam Dulatov – texnik nokaut (TKO), 1-raund
Magomed Zaynukov – Damian Rzepecki: debyutantlar dueli, “Tun jangi”ga da’vogar
Yengil vazn. Magomed Zaynukov va Damian Rzepecki bir paytning o‘zida ham UFC sahnasiga qadam qo‘yadi, ham darhol bir-biriga qarshi qo‘yiladi. Ikkalasi ham zarbador, ikkalasi ham xavfli.
Bu jangda ritm baland bo‘ladi. To‘xtovsiz almashinuvlar, oyoq ishlaridagi tezkor moslashuv, har bir zarbadan keyingi javob. Zaynukovning zarba texnikasi tozaroq, masofani boshqarishdagi ustunligi seziladi. Rzepecki esa keskin qarshi hujumlari bilan xavf tug‘diradi.
Ammo to‘liq uch raundlik masofada Zaynukovning aniqligi va tartibli bosimi ustun kelishi kutilmoqda.
Taxmin: Magomed Zaynukov – hakamlar qarori bilan g‘alaba
Rizvan Kuniev – Tyrell Fortune: og‘ir vazn, lekin og‘ir dramatika emas
Og‘ir vazn jangidan ko‘pchilik portlash kutadi. Bu safar esa, ehtimol, aksincha bo‘ladi. Rizvan Kuniev va Tyrell Fortune uslublari bir-birini “sindirish” emas, “bloklash”ga moyil.
Pozitsion kurash, xavfni minimallashtirish, ehtiyotkor zarbalar. Tomoshabinlar uchun bu jang unchalik yorqin bo‘lmasligi mumkin. Lekin Kunievning umumiy arsenalida biroz ustunlik bor: texnika, qaror qabul qilish, pozitsiyani nazorat qilish.
Shu sababli yakunda hakam Kuniev qo‘lini ko‘tarishi kutiladi.
Taxmin: Rizvan Kuniev – ochkolar bo‘yicha g‘alaba
Abubakar Vagaev – Saygid Izagakhmaev: 15 daqiqalik shaxmat
Yarim o‘rta vazn toifasidagi bu jangda nokaut emas, pozitsion jang va taktik kurash birinchi o‘ringa chiqadi. Abubakar Vagaev UFC’dagi ilk jangiga chiqadi, Saygid Izagakhmaev esa allaqachon o‘z nomini tanitib ulgurgan.
Uslublar bir-biriga yaqin: ehtiyotkorlik, nazorat, raqibni asta-sekin sindirishga urinish. To‘liq 15 daqiqa davom etishi deyarli aniq ko‘rinadi. Bu yerda so‘nggi paytdagi ritm va psixologik ko‘tarinkilik Vagaev foydasiga ishlashi mumkin.
Uning so‘nggi g‘alabalari, oqimdagi ishonchi hakamlar ko‘zida ham ta’sir qoldiradi.
Taxmin: Abubakar Vagaev – hakamlar qarori bilan g‘alaba
Oldindan janglar: yangi ismlar, katta xavf
Valter Walker – Thomas Petersen: oyoqqa tushgan tuzoq
Og‘ir vaznda Valter Walker ketma-ket to‘rt raqibini bir xil usulda — heel hook bilan taslim qilgan. Thomas Petersen esa kurash bazasiga ega, odatdagidek jangni yerga tushirishga intiladi.
Bu esa Walker uchun aynan kerak bo‘lgan ssenariy. Pastga tushgan paytning o‘zida oyoqqa hujum, tezkor ushlash va og‘riqli usul. Petersen ehtiyot bo‘lmasa, tarix yana takrorlanadi.
Taxmin: Valter Walker – bo‘ysundirish (submission)
Dustin Jacoby – Muhammad Saidov: tajriba va yangi to‘lqin to‘qnashuvi
Yengil og‘ir vaznda Dustin Jacoby ketma-ket uch g‘alabadan keyin to‘rtinchisini izlaydi. Qarshisida — xavfli debyutant Muhammad Saidov.
Saidovning zarbalari og‘ir, lekin Jacoby uchun bu birinchi marta emas. U UFC’dagi tajribasini, oktagonni his qilishni va jangni boshqarish ko‘nikmalarini ishga solishi kerak bo‘ladi. Agar u dastlabki bosimga chiday olsa, keyingi daqiqalarda tajriba o‘z so‘zini aytadi.
Natija? Jacoby o‘z vaqtida masofani topib, jangni zarbalar bilan yakunlashi mumkin.
Taxmin: Dustin Jacoby – texnik nokaut (TKO)
Santiago Ponzinibbio – Sam Patterson: vaqtga qarshi kurash
39 yoshli Santiago Ponzinibbio uchun har bir jang — ehtimol, so‘nggi boblardan biri. Bu safar unga qarshi yosh va och Sam Patterson turibdi, u nokautlari bilan tanilgan.
Bu juftlikda avlodlar almashinuvi aniq ko‘rinadi. Ponzinibbio tajribali, ammo tezlik va zarba chidamliligi avvalgi darajada emas. Patterson esa ilk daqiqalardanoq bosimni oshirsa, jang uzoq cho‘zilmasligi mumkin.
Birinchi raund — eng xavfli lahza. Aynan shu paytda Patterson o‘z zarbasini topishi kutilmoqda.
Taxmin: Sam Patterson – texnik nokaut (TKO), 1-raund
Ismael Bonfim – Axel Sola: kardio ham qurol
Yengil vaznda Ismael Bonfim UFC’dagi ilk yurishini yaxshi boshlagan edi, ammo uning eng katta muammosi allaqachon ma’lum: u “gasser”, ya’ni bir raunddan keyin keskin charchab qoladigan jangchi.
Axel Sola esa aynan shundan foydalanishi kerak. Dastlabki bosqichda xavfni minimallashtirib, jangni ikkinchi raundga olib kirish — asosiy vazifa. Bonfim tempni ushlab tura olmasa, himoyada xatolar ko‘payadi, bosh esa ochiq qoladi.
Shu yerda Sola o‘z zarbasi bilan yakuniy so‘zni aytishi mumkin.
Taxmin: Axel Sola – texnik nokaut (TKO), 2-raund atrofida
Magomed Tuchalov – Brendson Ribeiro: tez yakun kutilyapti
Yengil og‘ir vazn. Magomed Tuchalov UFC sahnasiga katta kutishlar bilan kirib kelmoqda. Qarshisida esa diviziondagi eng muvaffaqiyatsiz jangchilardan biri sifatida tilga olinadigan Brendson Ribeiro.
Bu yerda ssenariy murakkab emas: Tuchalovning zarba kuchi va agressiyasi, Ribeiro’nig esa himoyadagi bo‘shliqlari va barqarorlikdagi muammolari. Agar hammasi kutilganidek ketsa, jang birinchi raunddayoq yakun topadi.
Taxmin: Magomed Tuchalov – texnik nokaut (TKO), 1-raund
Nurullo Aliev – Mike Davis: natija an’anaviy bo‘lishi mumkin
Yengil vaznda Nurullo Aliev tomoshabinlar uchun eng yorqin jangchi bo‘lmasligi mumkin. Lekin u bir narsani doim qiladi — g‘alaba qozonadi. Uning uslubi aniq: takror-takror tushirishlar, nazorat, xavfni minimallashtirish.
Mike Davisga qarshi ham aynan shu reja ishga tushilishi kutiladi. Raqibni pastga olish, ustidan ishlash, raundlarni birin-ketin o‘g‘irlash. Bu uslub ko‘rkam emas, ammo hakamlar protokoli uchun juda samarali.
Taxmin: Nurullo Aliev – bir ovozdan (unanimous) hakamlar qarori bilan g‘alaba
Cody Gibson – Abdul Hussein: yangi nom uchun ideal sahna
Bantam vazn. Karta bo‘ylab oltinchi debyutant — Abdul Hussein — UFC’ga katta umidlar bilan kirib keladi. U mahalliy promoushenlarda ketma-ket yakuniy zarbalar va bo‘ysundirishlar bilan nom chiqargan.
Unga qarshi 38 yoshli Cody Gibson turibdi. Tajriba bor, ammo vaqt o‘z so‘zini aytmoqda. Aynan shunday juftliklar yangi nomlar uchun tramplin bo‘lib keladi.
Hussein yerda ham, turgan holatda ham xavfli. Ayniqsa, bo‘ysundirish usullarida. Agar u jangni tezda o‘z ritmiga kiritib olsa, Gibson uchun bu kecha juda og‘ir bo‘lishi mumkin.
Taxmin: Abdul Hussein – bo‘ysundirish (submission)
Etihad Arena’da bu kecha faqat g‘alaba va mag‘lubiyat haqida emas. Bu — sobiq chempionning qaytishi, yangi ismlarning sahnaga chiqishi, tajriba va yoshlik o‘rtasidagi uzluksiz almashuv. Savol esa bitta: bu kartadan keyin UFC xaritasida qaysi ism eng baland yoziladi?
