Yevropada qishki transferlar: Yoshlardan iborat yangi to‘lqin
Yevropa grandlari qishki oynaga hali oylar bor ekan, allaqachon yozuv daftarini to‘ldirib bo‘ldi. Diqqat markazida esa tajribali yulduzlar emas, ertangi kunni belgilashi mumkin bo‘lgan yoshlardan iborat yangi to‘lqin turibdi.
Kees Smit – "AZ"dan keyingi katta qadam?
"AZ Alkmaar"ning 20 yoshli markaziy yarim himoyachisi Kees Smit atrofida raqobat tobora kuchaymoqda. "Sunderland"ga qarshi Yevropa Ligasi uchrashuvi tribunasida "Liverpool" skautlari paydo bo‘ldi. Ular faqatgina qiziqish bildirish bilan cheklanmayapti – Smit uchun 51,5 million funt atrofidagi narx tilga olinmoqda.
Bu poygada faqat "Anfield" vakillari emas. "Chelsea", "Tottenham", "Nottingham Forest" va "Aston Villa" ham holatni diqqat bilan kuzatmoqda. 20 yoshda bo‘lishiga qaramay, Smitning o‘yini unga katta sahnaga sakrash uchun tayyor futbolchi sifatida qaralayotganini ko‘rsatmoqda. Savol bitta: kim birinchi zarba beradi?
"Tottenham"ning braziliyalik rejasi: Arthur Dias uchun sprint
Londonning boshqa qismi ham jim emas. "Tottenham" 19 yoshli braziliyalik markaziy himoyachi Arthur Dias bo‘yicha poygada oldinga chiqib olgan. "Athletico Paranaense" futbolchisi uchun 30 million yevro atrofida summa tilga olinmoqda.
"Newcastle United", "Nottingham Forest" va "Brentford" ham Diasni kuzatayotgani aytilmoqda, lekin hozircha yo‘lni "Spurs" ochib boryapti. Himoya chizig‘ini yosh, agressiv va tezkor futbolchi bilan yangilash – "Tottenham"ning yaqin oylar uchun aniq rejasi shunday ko‘rinmoqda.
"Monaco"da katta tozalash: Folarin Balogun chiqishga tayyor
"Monaco" hujum chizig‘ida keskin qarorga kelgan. Klub 25 yoshli AQSh hujumchisi Folarin Balogunni yanvarda sotishni rejalashtirayotganini tasdiqladi. Transfer oynasining so‘nggi kunida u "Everton"ga o‘tish fikridan qaytgandi, endi esa yo‘llar ajralishi deyarli muqarrar ko‘rinadi.
Balogun uchun yangi manzil hali aniq emas, lekin bozor sharoitida yosh, tezkor va golli hujumchi kamyob. Demak, yanvar kelishi bilan takliflar kam bo‘lmaydi.
"Manchester United" – Jarrad Branthwaitega ko‘z tikdi
"Himoyani qayta qurish" rejasi "Manchester United" kun tartibidan tushmayapti. Klub 24 yoshli "Everton" va Angliya terma jamoasi markaziy himoyachisi Jarrad Branthwaite o‘yinlarini yaqindan kuzatmoqda.
Branthwaite "Premier League"da jismoniy kuch, baland bo‘y va to‘p bilan muomala qilish sifatini uyg‘unlashtira oladigan kam sonli himoyachilardan biri sifatida ko‘rilmoqda. "United" uchun esa aynan shunday profil yetishmayotgani allaqachon ko‘rinib qolgan.
"Chelsea" akademiyasi ostida navbat: Josh Acheampongga navbat
"Stamford Bridge" atrofidagi e’tibor faqat katta transferlarga qaratilmagan. 20 yoshli ingliz himoyachisi Josh Acheampong holati bir nechta yevropalik klublar kuzatuvida. U "Chelsea" tizimida bo‘lsa-da, o‘yin amaliyoti va kelajakdagi roli borasida savollar ko‘paymoqda.
Agar "Chelsea" unga birinchi jamoada yo‘l ochib bermasa, yanvar oynasida Acheampong uchun takliflar paydo bo‘lishi ajab emas. Boz ustiga, yosh ingliz himoyachilariga talab doim yuqori bo‘lgan.
Lamine Camara – "Monaco" eshigini biroz ochdi
"Monaco" faqat sotish bilan cheklanmaydi. Klub 22 yoshli senegallik markaziy yarim himoyachi Lamine Camara bo‘yicha yanvar oyida kelishuv bo‘lishi mumkinligini tan oldi. Bu nomga esa ikki gigant – "Liverpool" va "Chelsea" qiziqmoqda.
Kuchli pressing, katta maydonni yopish va to‘p bilan tez qaror qabul qilish – Kamaraning asosiy qurollari. Ayni paytda Yevropa top-klublari aynan shunday dinamik "sakkizlik" va "oltichilik" profilidagi futbolchilarni izlayotgani sir emas.
"Real Madrid"ning navbatdagi marvaridi: Abdellah Ouazane
"Real Madrid" yosh iste’dodlar bozorida yana bir bor oldinga chiqmoqchi. Klub 17 yoshli marokashlik yarim himoyachi Abdellah Ouazane uchun maksimal darajada harakat qilishga tayyorlanmoqda. U hozircha "Ajax" tizimida, ammo Madrid rejalari jiddiy.
Yosh bo‘lishiga qaramay, Ouazane allaqachon "Marokash futbolining yangi marvaridi" sifatida tilga olinmoqda. "Real" uchun bu – uzoq muddatli loyiha, lekin bunday imkoniyatlar ko‘p chiqavermaydi.
"Newcastle" va Bo Hegland: yozda bekor bo‘lgan transfer qayta tiklanadimi?
"Newcastle United" yozda amalga oshmay qolgan rejaga qaytmoqchi. Klub 22 yoshli norvegiyalik yarim himoyachi Bo Hegland bo‘yicha qiziqishni yangilashga tayyorlanmoqda. U yozda "Djurgarden"dan ketmaslikni tanlagandi, endi esa yanvar boshqa ssenariy olib kelishi mumkin.
"Newcastle" o‘yin sur’atini ushlab turadigan, pressingda ishlaydigan va to‘pni tez oldinga yetkazadigan yarim himoyachini izlayapti. Hegland shu profilga mos keladigan variant sifatida ko‘rilmoqda.
Yana bir 17 yoshli nishon: Luca Weinhandl atrofidagi kurash
Avstriyaning "Sturm Graz" klubi tarkibidagi 17 yoshli yarim himoyachi Luca Weinhandl ham skautlar daftariga qat’iy kirib oldi. Uning transfer qiymati 20 million funt atrofida baholanmoqda.
"Arsenal", "Brighton" va "Aston Villa" Weinhandlni yaqindan kuzatayotgan klublar qatorida. Uchala jamoa ham yosh, texnik va taktik jihatdan moslashuvchan yarim himoyachilar bilan kelajakni qurishga urinmoqda. Bu poygada kim jasurroq bo‘lsa, yutadi.
Mauro Icardi – "Tottenham" uchun kutilmagan variant
Tajribali hujumchi Mauro Icardi bozorni erkin agent sifatida tark etgan. U "Galatasaray" bilan xayrlashdi va endi klub izlamoqda. "Tottenham" uni hujum chizig‘ini chuqurlashtirish uchun variant sifatida ko‘rib chiqmoqda.
Bitta cheklov bor: Icardi hozir imzo chekkan taqdirda ham, yanvargacha ro‘yxatdan o‘tkazib bo‘lmaydi. Shunga qaramay, gol hidini yaxshi biladigan 33 yoshli hujumchi bozor chekkasida qolib ketmaydi.
Felix Nmecha – "Manchester City" va "Liverpool" qarama-qarshiligi?
Yana bir markaziy sahna – Germaniya yarim himoyachisi Felix Nmecha atrofida. 25 yoshli futbolchi uchun "Manchester City" va "Liverpool" qiziqish bildirmoqda. Uning klubi "Borussia Dortmund" esa 80–90 million yevro atrofida narx so‘rashga tayyor.
Bu miqdor hazil emas. Lekin zamonaviy futbolning markazida o‘yin sur’atini boshqarib, pressingda ishlay oladigan, texnik jihatdan pishiq yarim himoyachilar turishini inobatga olsak, bu raqam hamon muhokama qilinadi. Endi savol: bu katta chekni kim yozadi?
Qishki bozor hali ochilgani yo‘q, lekin sahna allaqachon tayyor. Endi esa navbat – eng tezkor, eng qat’iy va eng dadil qaror qabul qiladigan klubga.
