BlueCo davri: katta pul va katta xatolar
BlueCo boshqaruvi ostidagi Chelsea transfer siyosati ko‘p narsani va’da qilgandi: yangi davr, yangi yulduzlar, yangi hukmronlik. Amalda esa bu davr ko‘pincha yo‘qolgan mavsumlar, sindirilgan ishonch va savol ostida qolgan qarorlar zanjiriga aylandi. Quyidagi nomlar – aynan shunday yo‘qotilgan imkoniyatlarning jonli ramzi.
Carney Chukwuemeka: shov-shuv bilan kelib, jim ketgan yigit
Aston Villa safidan £20m evaziga kelganida Carney Chukwuemeka atrofida shovqin juda katta edi. U Under-19 European Championshipda Angliyani chempion qilgan bo‘lib, kelajak yulduzi sifatida ko‘rilardi. Stamford Bridge esa unga sakrash maydoni bo‘lishi kerak edi.
Ammo jarohatlar va murabbiylar ishonchining yo‘qligi bu rejani yo‘qqa chiqardi. Ikki yarim yil ichida atigi 32 o‘yin. Hech qanday iz qoldirmagan davr. Natijada u dastlab ijaraga, so‘ngra butunlay Borussia Dortmund safiga yo‘l oldi. Chelsea uchun esa bu transfer deyarli “bo‘lmagandek” bo‘lib qoldi.
Christopher Nkunku: Bundesliga yulduzidan so‘nib qolgan umid
Christopher Nkunku transferi boshida klub uchun zarba bo‘lishi kerak edi. RB Leipzigdan £52m evaziga kelgan fransuz hujumchisi Bundesligada gollarni sermahsul urib, BlueCo davrining hujumdagi yuziga aylanishi kutilgan.
Ammo hammasi pre-season paytidagi og‘ir tizzadan olgan jarohatdan boshlandi. 2023-24 mavsumining yarmi maydondan tashqarida o‘tdi va u hech qachon eski ritmini topa olmadi. 2024-25 mavsumida sog‘lom bo‘lsa ham, Cole Palmer jamoadagi asosiy yulduzga aylangan bir paytda Nkunku ikkinchi planga tushib qoldi. Atigi 27 ta Premier League o‘yini – shundan so‘ng u yozda AC Milan safiga sotildi. Chelsea uchun bu transfer “agar...” bilan boshlanadigan navbatdagi hikoyaga aylandi.
Alejandro Garnacho: Old Trafforddagi uchqun, London osmonida o‘chdi
O‘tgan yozda Chelsea £40m evaziga Manchester Uniteddan Alejandro Garnacho transferini amalga oshirganda, ko‘pchilik bu “bozor imkoniyatidan mohirona foydalanish” deb baholadi. Ruben Amorim qo‘l ostida Unitedda chetga surib qo‘yilgan bo‘lsa-da, uning talanti shubha ostida emas edi.
Ammo Stamford Bridgeda u o‘zini butunlay yo‘qotdi. Old Traffordda uni ajratib ko‘rsatgan jasorat, beparvo driblinglar, keskir yugurishlar – bularning bari g‘oyib bo‘ldi. Enzo Maresca ham, Liam Rosenior ham uni doimiy asosiy tarkib futbolchisiga aylantira olmadi. Chap qanotdagi o‘yinlari ko‘pincha unutiladigan, ta’sirsiz chiqishlarga aylandi.
Endi esa klub allaqachon zararini qisqartirishga tayyor ekani aytilmoqda. Ammo £43–£45m atrofida narx so‘ralayotgan bir paytda, bu sarguzasht asosan Manchester United foydasiga ishlagani ayon bo‘lib qoldi.
Pierre-Emerick Aubameyang: bir kunlik Tuchel davrining qurboni
Pierre-Emerick Aubameyang transferining asosiy dramatik nuqtasi – vaqt. Uni yozda Barcelona safidan aynan Thomas Tuchel iltimosiga ko‘ra olib kelishdi. Ammo nemis mutaxassisi hujumchi debyutidan atigi bir kun o‘tib ishdan bo‘shatildi.
Shundan keyin Aubameyang uchun hammasi qiyinlashdi. Graham Potter uni hech qachon to‘liq ishontirib ololmadi, hujumchi asta-sekin chetga surildi va yakunda butunlay muzlatib qo‘yildi. Bir mavsum, 21 o‘yin, 3 gol – shuncha. Keyin esa u erkin agent sifatida Marseillega jo‘nab ketdi. Klub tarixida “nega bunday bo‘ldi?” degan savolni eng ko‘p tug‘dirgan transferlardan biri sifatida qoladi.
Kalidou Koulibaly: mudofaa ustunidan xato ramziga aylangan kecha
Kalidou Koulibaly kelganida, ko‘pchilik Chelsea himoyasi endi yillar davomida mustahkamlanadi deb ishongan. Napoli safida yillar davomida yuqori darajada o‘ynagan senegallik markaziy himoyachi BlueCo davrining ilk transfer oynasida asosiy figura sifatida kelgandi.
Ammo klubdagi notinchlik, murabbiylar almashinuvi va moslashishdagi qiyinchiliklar uni tezda qiynab qo‘ydi. Bir nechta yirik xatolar, ishonchning pasayishi – va u hech qachon haqiqiy yetakchiga aylanmadi. Bir yil o‘tib Chelsea qarorini qildi: Koulibaly Saudiya Arabistonidagi Al-Hilal safiga sotildi. U esa Gulf davlatiga ko‘chib o‘tgan ilk katta ismlar to‘lqinining bir qismiga aylandi.
Raheem Sterling: shov-shuvli start, sokin va og‘ir yakun
Raheem Sterling transferi BlueCo davrining bosh sahnasi bo‘lishi kerak edi. Manchester Citydan £47.5m evaziga kelgan, ko‘p karra Premier League chempioni, tajribali, golli vinger. Rejada u yosh tarkib orasida tayanch, mezon, g‘alaba mentalitetini olib keladigan futbolchi bo‘lishi kerak edi.
Ammo ikki mavsum ketma-ket kutilgan darajaga yetmadi. Gollar kam, ta’sir notekis, o‘yinlar ko‘pincha xira. Maresca kelgach, Sterling “bomb squad” deb ataladigan chetlatilganlar guruhiga tushib qoldi va 2024-25 mavsumini Arsenalda muvaffaqiyatsiz ijarada o‘tkazdi. 2025 yozida qaytgach ham vaziyat o‘zgarmadi. Nihoyat, 2026 yil yanvarida uning shartnomasi bekor qilindi – klub safida oxirgi o‘yinidan 18 oy o‘tib.
Joao Felix: ikki bor takrorlangan xato
BlueCo rahbariyati shunchalik xohlagan futbolchi bo‘ldiki, Joao Felixni ikki marta imzolashdi. Ammo orqaga qaralganda, ehtimol bir marta ham kerak emasdi.
U 2023 yil yanvarida Atletico Madriddan qisqa muddatli ijaraga kelganida ham katta savollar bor edi – Ispaniyada ham u to‘liq ochilib ketmagandi. Chelsea safidagi debyutida Fulhamga qarshi qizil kartochka olgani esa go‘yo ogohlantiruvchi ishora bo‘lishi kerak edi. Bo‘lmadi.
Shunga qaramay, klub 2024 yilda, uning Barcelona safidagi samarali davridan so‘ng, yana imkon berdi. Bu safar ham uzoqqa cho‘zilmadi: Maresca qo‘l ostida atigi yarim mavsum, hech qanday barqaror ta’sir, hech qanday yetakchilik. Keyin u ijaraga AC Milan safiga jo‘natildi va 2025 yozida Al-Nassrga butunlay sotildi. Ikki urinish, bir xil xulosa: bu ittifoq hech qachon ishlamadi.
Facundo Buonanotte: ko‘rganlar kam, eslaganlar undan ham kam
Facundo Buonanotte nomi ko‘pchilik Chelsea muxlislarining xotirasida ham yo‘q bo‘lishi mumkin. 2025 yil yozining so‘nggi daqiqalarida Brighton safidan ijaraga olingan argentinalik hujumkor yarim himoyachi, ehtimol, shunchaki zaxira chuqurligini oshirish uchun kelgandi.
Natija esa – bor-yo‘g‘i 8 ta o‘yin, ulardan faqat bittasi Premier Leagueda. Ko‘pincha hatto zayavkaga ham kiritilmasdi. Yanvarda ijarasi muddatidan oldin bekor qilindi. Keyingi yarim mavsumni Leeds safida ham shunga o‘xshash xira tarzda o‘tkazdi. Bu transfer ham qog‘ozda bor, amalda deyarli yo‘q bo‘lgan bitimlardan biri bo‘lib qoldi.
Deivid Washington: uzoq muddatli shartnoma, qisqa xotira
Deivid Washington nomi hozir ham Chelsea ro‘yxatida turadi, lekin ko‘pchilik buni unutib bo‘lgani aniq. Santosdan 2023 yilda £17m evaziga olib kelingan hujumchi o‘sha paytdagi ko‘plab yoshlar kabi juda uzoq muddatli shartnomaga imzo chekkan edi.
Uch yil ichida asosiy jamoada atigi 3 ta o‘yin. Asosan development squad tarkibida, 2025 yilda esa yana Santosga ijaraga qaytdi. U yerda ham jiddiy iz qoldira olmadi va yana chaqirib olindi. Endi 21 yoshda, lekin Stamford Bridgeda kelajak deyarli ko‘rinmaydi. Uning keyingi qadami – deyarli aniq, doimiy transfer.
Mykhailo Mudryk: doping bilan yakunlangan dahshatli sarguzasht
Mykhailo Mudryk hikoyasi BlueCo davrining eng dramatik, eng alamli sahifalaridan biri. Shakhtar Donetskdan 2023 yil yanvarida £89m evaziga kelganida, bu transfer klub tarixidagi eng hayajonli kelishlardan biri sifatida qarshi olingandi. Tezlik, dribling, jasorat – hammasi bor edi, deyishardi.
Ammo Chelsea safida u deyarli hech qachon o‘sha erkin, ishonchli yosh yulduzga o‘xshamadi. Murabbiylar almashdi, tizimlar o‘zgardi, Mudryk esa doimiy ravishda tarkibga kirib-chiqib yurdi. O‘yinidagi ishonch kamaydi, raqiblar uchun xavf darajasi ham pasaya bordi.
2024 yil noyabrida u vaqtinchalik chetlatildi. Doping bo‘yicha tekshiruv boshlangan edi. 2026 yil aprelida esa Football Association tomonidan maksimal – to‘rt yillik diskvalifikatsiya e’lon qilindi. Mudryk apellyatsiya berdi, 2026-27 mavsumida maydonga qaytish umidi haqida xabarlar bor, ammo bir narsa aniq: uni yana Chelsea libosida ko‘rish ehtimoli juda past.
BlueCo davri hali tugamadi. Klub yana sarmoya kiritadi, yana yangi ismlar keladi. Savol esa o‘sha: bu marta o‘tmishdagi xatolardan saboq olinganmi yoki Stamford Bridgeda yana bir qimmatga tushadigan xayoliy “qurilish”ni ko‘ramizmi?
