De la Fuente: Argentina xatti-harakatlari chidab bo‘lmas
MetLife Stadiumdagi dramatik final ortidan maydon tinchimadi. Kubok Ispaniya qo‘liga o‘tgach, e’tibor birdaniga hisobga emas, balki oxirgi daqiqalardagi keskin sahnalarga qaratildi. Endi esa bu voqealar FIFA stolida.
Ispaniya terma jamoasi bosh murabbiyi Luis de la Fuente bo‘lib o‘tgan hodisalarni keskin baholadi. U Ispaniya davlat telekanali TVE bilan suhbatda Argentina futbolchilarining xatti-harakatlarini “chidab bo‘lmas va qabul qilib bo‘lmaydigan” deb atadi.
Maydondagi to‘qnashuvlar
FIFA dushanba kuni o‘zining intizom prokurorlaridan biriga yakshanba kungi final yakunidagi sahnalarni o‘rganish bo‘yicha topshiriq berdi. Ispaniyaning qo‘shimcha daqiqalardagi 1:0 hisobidagi g‘alabasi, amaldagi chempionni taxtdan tushirgani bilan emas, keskin to‘qnashuvlar bilan ham esda qoldi.
Argentina yarim himoyachisi Leandro Paredes Ispaniya futbolchilari Eric Garcia va Gavi bilan jismoniy tarzda tortishib ketdi. Yana bir epizodda Ispaniya sardori Rodri yugurib o‘tayotgan paytda Argentina himoyachisi Nahuel Molina zarbasini qorniga oldi.
“Bunga yo‘l qo‘yib bo‘lmaydi,” — dedi De la Fuente. U o‘sha paytda bu holatlarni ko‘rmaganini, boshqa odamlar bilan bayram qilayotgan bo‘lganini aytib o‘tdi. Shunga qaramay, murabbiy pozitsiyasini aniq bildirdi: “Baribir, bunday darajadagi futbolchilarning bu ishini chidab bo‘lmas va qabul qilib bo‘lmaydigan deb hisoblayman. Ularni finaldan oldingi kunlarda maqtagan edim, murabbiylari ham juda zo‘r.”
FIFA hozircha tekshiruv doirasi, qaysi epizodlar va kimlarning ko‘rsatmalari o‘rganilishi haqida aniq ma’lumot bergani yo‘q.
Ayala uzr so‘radi, Ispaniya o‘zini tutdi
Argentina terma jamoasi yordamchi murabbiyi Roberto Ayala chorshanba kuni Dani Olmo bilan bo‘lib o‘tgan to‘qnashuv yuzasidan uzr so‘radi. U holatni zarba emas, “itarish” deb ta’rifladi.
De la Fuente esa, aksincha, o‘z futbolchilarining reaksiyasidan faxrlanmoqda. TVEga bergan intervyusida u Ispaniya futbolchilarining bosim ostidagi o‘zini tutish madaniyatini alohida ta’kidladi:
“Shunday tajovuz va qo‘zg‘atishlarga qaramay, bizning xulq-atvorimizni alohida qayd etmoqchiman. Futbolchilarimiz doimo o‘zini bosib oldi va haqiqiy professionaldek ish tutdi,” — dedi u.
MetLife Stadiumdagi marosim ham keskin kayfiyatda o‘tdi. Ispaniya futbolchilari Argentina o‘yinchilari podiumga, medallarini olish uchun ko‘tarilayotganda ularga sharaf yo‘lagini tashkil qilib, hurmat ko‘rsatdi. Ammo oradan bir necha daqiqa o‘tib, Rodri kubokni ko‘targan paytda Argentina futbolchilarining aksariyati marosimga ort bilan turib oldi.
FIFA intizom mexanizmi ishga tushdi
FIFA intizom qoidalariga ko‘ra, maxsus prokuror a’zo assotsiatsiyalar, klublar va shaxslarga nisbatan intizom ishini ochishni so‘rash va jazo choralarini taklif qilish vakolatiga ega. Hozir aynan shu mexanizm ishga tushgan.
Biroq muddatlar mavhum. FIFA tekshiruv qachon yakunlanishi, ish ochilsa, qaysi bandlar bo‘yicha ko‘rilishi haqida aniq sana bermadi. Yana bir noaniq jihat: Argentina terma jamoasi yaqin oylar ichida rasmiy o‘yinlarga ega emas, shuning uchun ehtimoliy diskvalifikatsiyalar qachondan kuchga kirishi ham hozircha qorong‘i.
Finaldagi keskinlik endi protokollar, bayonotlar va intizom kodekslari darajasiga ko‘tarildi. Savol esa ochiq: MetLife kechasining soyasi Argentina va Ispaniya uchun keyingi xalqaro sahnada qanday oqibatlar keltiradi?
