Laporta transferda o‘z shartlarini qo‘ydi: Alvarez haqida ma’lumot
Ispaniya va Fransiya o‘rtasidagi Jahon chempionati yarim finali arafasida, AQShda bo‘lib turgan Barcelona prezidenti Joan Laporta klubning Atletico hujumchisi Alvarez bo‘yicha pozitsiyasini aniq qilib qo‘ydi. Katalonlar futbolchiga jiddiy qiziqish bildirgan, ammo stol ustidagi taklif abadiy kutib turmaydi.
Laporta gapni cho‘zmay aytdi: Barcelona bu transferda o‘z shartlarini qo‘ygan va ularni o‘zgartirish niyatida emas.
“Biz hech kimning kuyiga raqsga tushmaymiz. Ritmni bu yerda biz belgilaymiz. Taklif berdik, lekin bu ochiq qoladigan, cheksiz muddatli taklif emas. Qancha vaqt amal qilishini ko‘ramiz. Murabbiy va texnik shtab so‘ragan futbolchini olib kelish niyatimizni allaqachon bildirdik. U bizga juda yoqadi, menimcha, u fantastik futbolchi”, – dedi Laporta jurnalistlarga.
Murakkab munosabatlar va “aniqlik qo‘ng‘irog‘i”
Barcelona va Atletico o‘rtasidagi transfer aloqalari yillar davomida oson bo‘lmagan. Yuqori darajadagi bitimlar atrofida keskinlik, shubha, ehtiyotkorlik – bular odatiy manzara.
Laporta bu safar vaziyatni shaxsan nazoratga olganini ta’kidladi. Uning aytishicha, Metropolitano rahbariyatiga yuborilgan taklif atrofida tushunmovchilik paydo bo‘lgan va u bunga tezda nuqta qo‘ygan.
“Ular bilan munosabatlarimiz juda yaxshi, deb o‘ylayman. Bergan taklifimiz bo‘yicha biroz chalkashlik bo‘ldi, men uni aniqlashtirdim. Hech qanday qo‘shimcha bosim o‘tkazmadik. Faqat shuni aytdimki, ular alternativ variant topgan paytdan boshlab bu taklif hamon kuchda. Va shu yerda masala tugadi. Hozircha bundan nariga o‘tmagan”, – deya qo‘shimcha qildi u.
Ya’ni, Barcelona eshikni yopgani yo‘q, lekin uni ochiq qoldirib ham qo‘ymagan. Qaror endi Atletico qo‘lida.
Alvarez – Jahon chempionatidan keyingi “issiq” nom
Alvarezning bozordagi obro‘si 2026 yilgi Jahon chempionati fonida yanada oshdi. Argentina hujumchisi chorak finalda Shveytsariyaga qarshi o‘yinda ajoyib g‘alaba goli kiritib, e’tiborni yana o‘ziga qaratdi.
26 yoshli forvard o‘tgan mavsumda Atletico safida barcha musobaqalar hisobida 20 ta gol urdi. Uning aniqligi, jarima maydonidagi sovuqqonligi va turli taktik sxemalarga moslasha olish qobiliyati Barcelona texnik bo‘limini aynan shu nomga to‘xtalishga majbur qilgan.
Katalonlar hujum chizig‘ini yangilashni rejalashtirar ekan, Alvarez ularning ro‘yxatida birinchi o‘rinda turibdi.
Arsenal soyada emas, peshma-pesh
Bu kurashda Barcelona yolg‘iz emas. Angliya frontidan ham kuchli raqib ko‘rinib turibdi. Arsenal Alvarez transferini o‘z qo‘liga olish, bitimni pre-sezon boshlanishidan oldin yopishga urinayotgani haqida xabarlar bor.
London klubi Alvarezga jiddiy loyiha taklif qilishga tayyor ekani aytilmoqda. Shunga qaramay, futbolchining o‘zi faoliyatini Ispaniyada davom ettirishni afzal ko‘rishi haqida ma’lumotlar chiqmoqda.
Agar bu kayfiyat o‘zgarmasa, Barcelonaning pozitsiyasi kuchayadi. Lekin vaqt ularning tomonida emas – Laporta aytganidek, taklifning muddati bor.
Hozircha bitta maqsad: Jahon chempionati
Transfer bozorida shovqin ko‘paygan bo‘lsa-da, Alvarezning o‘zi hozircha bu to‘lqinlardan yiroq. Uning butun e’tibori Jahon chempionatiga qaratilgan.
Argentina chorshanba kuni Angliyaga qarshi yarim finalga tayyorgarlik ko‘rmoqda. Turnir taqdiri, keyin esa, ehtimol, futbolchining klub kelajagi hal bo‘ladi.
Alvarez hozircha gol uryapti, sahnani yoritib turibdi. Endi savol bitta: keyingi mavsumda bu gollarni qaysi stadion muxlislari ko‘radi – Camp Nou, Metropolitano yoki London osmoni ostidagilar?
