Liverpool yangi Salahni qidiryaptimi?
Liverpool yana bir bor Mohamed Salah ssenariysini takrorlash imkoniga ega. Savol bitta: jurʼat etadimi?
Salahdan qolgan bo‘shliq va bo‘sh bozor
Bugun Salah – klub tarixidagi eng buyuk futbolchilardan biri sifatida xayrlashmoqda. Ammo u Anfieldga kelgan paytda hamma ham bunga ishongan emasdi. Premier League’dagi birinchi urinish muvaffaqiyatsiz chiqqan, Londondagi davri uning obro‘sini yemirgan, shuning uchun AS Roma’dan kelgan transfer shubha ostida qarshi olingan edi.
Liverpool esa raqamlarni, dinamika va potentsialni ko‘rdi. Shubhalarga qaramay, tavakkal qildi. Natija hammaga maʼlum: Salah debyutidan boshlab gol ura boshladi va deyarli to‘xtamadi. U nafaqat klub afsonasiga aylandi, balki ingliz futboli tarixidagi eng sermahsul hujumchilardan biri bo‘lib qoldi.
Endi esa o‘sha o‘ng qanot bo‘sh. Va aynan mana shu paytda bozor Liverpool uchun juda noqulay ko‘rinmoqda. O‘ng qanotga munosib nomzodlar kam, narxlar esa haddan tashqari yuqori. Yan Diomande Paris Saint-Germain’ni tanladi, rejalardan biri chippakka chiqdi, klub esa yangi variant izlashga majbur.
Matias Soule – raqamlar gapirayotgan yigit
Shu fon’da Matias Soule nomi paydo bo‘ladi. Argentina vakili bu yozda Roma’dan ketishi mumkin, uning atrofida esa Salah transferini eslatuvchi vaziyat shakllanmoqda: raqamlar – juda kuchli, obro‘ – yetarlicha yuqori emas.
O‘tgan mavsumda o‘ng qanotdan bunday samaradorlikni taqdim eta olgan futbolchilar ko‘p emasdi. Yoshi 24 dan kichik bo‘lganlar orasida esa atigi uchta ism Soule bilan bir qatorda tilga olinadi: Lamine Yamal, Maghnes Akliouche va Dango Ouattara. Qolganlar yoki allaqachon yulduzga aylangan, yoki bozorda yo‘q.
Soule esa bor. Va eng muhimi – sotuvda.
Gazzetta dello Sport xabariga ko‘ra, Roma 40 million yevro atrofidagi taklifni qabul qilishga tayyor. Yevropa bozorida o‘ng qanot uchun bunday paketni topish deyarli imkonsiz: 23 yosh, ko‘ppozitsiyali hujumchi, raqamlari yuqori, narxi esa “yulduzlar” segmentidan ancha past.
Soule markaz ortidagi uchlikning istalgan pozitsiyasida o‘ynay oladi, o‘ng qanotda esa ayniqsa xavfli. Bu Liverpool’ning tizimi uchun juda muhim omil: moslashuvchanlik, pressingga tayyorlik va yarim fazolarda ishlash qobiliyati klub falsafasiga juda mos tushadi.
Salah soyasi va yangi tavakkal
Albatta, bu yerda gap Salahning o‘rnini to‘liq bosish haqida emas. Misrlik yulduz darajasiga chiqish – butun bir avlod uchun ham oson vazifa emas. Ammo hikoya o‘xshash: bozor tomonidan yetarlicha baholanmayotgan, lekin statistikasi juda jozibador bo‘lgan futbolchi, katta sahnaga portlab kirish arafasida turgandek ko‘rinadi.
Salah Roma’da bo‘lganida ham shunday edi. Raqamlar – yuqori, lekin nomi – “shubhali”. Liverpool esa boshqalardan ko‘ra tezroq ishonch bildirdi va yutdi.
Bugun Soule ham shunga yaqin nuqtada turibdi. Bozor uni hali “majburiy transfer” sifatida ko‘rmayapti. Top-klublarning ko‘pi boshqa yo‘nalishlarga qarab qolgan. Ammo aynan shunday paytlarda Liverpool tarixan eng to‘g‘ri qarorlarni qabul qilib kelgan.
Shu bois savol tobora keskinlashmoqda: klub yana bir bor raqamlar va instinktga ishonyaptimi? Yoki Salahdan keyingi bo‘shliqni qimmat, lekin “tanish” yulduz bilan to‘ldirish yo‘lini tanlaydimi?
Anfield bu yozda faqat bitta futbolchini emas, balki yangi davr ramzini izlayapti. Shu ramz Matias Soule bo‘lishi mumkinmi?
