Newcastle United: Katta pul, lekin boshqa yo‘l
Anthony Gordon va Sandro Tonali sotildi. Kassaga qariyb 188 million yevro tushdi. Ammo St James’ Parkda bu yoz – yulduzlar shousi emas. Bu – hajm, yosh va salohiyat oynasi.
Sport direktori Ross Wilson klubdagi ilk transfer oynasini boshqarmoqda va Sky Sports ma’lumotiga ko‘ra, yoz oxiriga qadar 6–8 nafar futbolchi kelishi mumkin. Bu shunchaki yangilanish emas, Eddie Howe davridagi eng keskin qayta qurilish bo‘lishi kutilmoqda.
Vazifa aniq: yosh, ochko‘z, o‘sishga tayyor futbolchilar. Butun tarkibni yangilash.
Toure keldi, Stour yo‘lda
Pul allaqachon harakatga tushdi. Hoffenheimdan Bazoumana Toure uchun qariyb 49 million yevro sarflandi. U – Gordon ketganidan keyin qanotdagi asosiy bo‘shliqni to‘ldirishi kutilayotgan nomzod.
Ortidan esa Ajax tizimida “mujiza bola” sifatida tilga olingan Sean Stour keladi, taxminan 27 million yevrolik bitim yakunlanmoqda. Newcastle endi tayyor yulduz emas, keyingi yulduzlarni sotib olayotgan klubga aylanmoqda.
Tonali soyasida: Manzambi rejasi
O‘rta chiziqda esa Freiburg futbolchisi Johan Manzambi asosiy nishonga aylangan. Klub ichida u Tonali bilan ma’lum o‘xshashliklarga ega o‘yinchi sifatida ko‘rilmoqda: temp, agressiv pressing, to‘p bilan chiqish sifati.
Sky Sports ham aynan shuni urg‘uladi: Manzambi – Tonaliga o‘xshash atributlarga ega, Toure esa Gordonning o‘rnini bosuvchi sifatida ko‘rilmoqda. Newcastle o‘rtada bo‘shliq qoldirmoqchi emas, tizimni qayta yig‘moqda.
Bitim yakuniga juda yaqin, savol faqat vaqtga o‘xshaydi.
Darvozabonlar bo‘limi: Trafford hali ham ro‘yxatda
Ewen Jaouen kelgan bo‘lsa-da, darvoza masalasi yopilgan emas. U hozircha zaxira varianti sifatida ko‘rilmoqda, asosiy raqobat uchun esa nomzodlar ro‘yxatining yuqori qismida James Trafford turibdi.
Newcastle so‘nggi yillarda jarohatlar, shakl va ishonchsizlik tufayli darvozada barqarorlik topa olmadi. Endi esa ortda xavfsiz, yosh va uzoq muddatga yechim beradigan raqam bir izlanmoqda.
Himoya chizig‘i: Trippierdan keyingi hayot
Kieran Trippier ketdi. Tino Livramento esa jarohatlar va potentsial transfer shov-shuvlari fonida ishonchli tayanch bo‘la olmayapti. Shu bois o‘ng qanot himoyachisi – yozgi rejalarning markazida.
Chap qanotda ham savollar bor. Lewis Hall yakka holda butun mavsumni ko‘tarishi kutilmayapti. Klub kamida raqobat va yengillik beradigan yana bir chap qanot himoyachisini olib kelish variantini ko‘rib chiqmoqda.
Newcastle himoyani qayta tiklamas ekan, yuqori maqsadlar haqida gapirish qiyin. Bu rahbariyat ham, murabbiy shtabi ham yaxshi tushunib turibdi.
Hujum chizig‘i: sarmoya, lekin javob yo‘q
Oldingi yozda Yoane Wissa va Nick Woltemade uchun jiddiy mablag‘ sarflandi. Natija esa kutilgan darajada bo‘lmadi. Gollar, ta’sir, o‘yin taqdiri – bu ikki ism atrofida bu savollar ochiq qolmoqda.
Shu bois Sky Sports xabariga ko‘ra, klub yana bir hujumchi izlamoqda. Hozircha Wissa va Woltemade bo‘yicha yangi sotuv xabarlari yo‘q, lekin ularning mavqei ancha zaiflashgani aniq. Newcastle hujumda raqobatni keskinlashtirmoqchi.
Yulduz emas, tizim qurilmoqda
Newcastle qo‘lidagi katta pulni bitta superyulduzga emas, butun tarkibni qayta shakllantirishga yo‘naltiryapti. Yosh, isbotlashga chanqoq, yuqori “upside”ga ega futbolchilar – klubning hozirgi strategiyasi aynan shu.
Savol endi boshqacha: bu hajmli, lekin maqsadli qayta qurilish Newcastle’ni yana Chempionlar Ligasi poygasiga qaytara oladimi yoki bu yoz – katta xavf bilan bog‘liq tajribaga aylanadimi?
