Ancelotti Neymarning Braziliya terma jamoasidagi davriga nuqta qo‘ydi
Braziliya futbolida bir davr yopildi. Carlo Ancelotti buni rasman tasdiqladi: Neymar endi Seleção formasini kiymaydi. Hech qanday “balki”, hech qanday “ko‘ramiz” qolmadi – qarorni futbolchining o‘zi qabul qilgan.
Yillar davomida Braziliya hujumi atrofida aylangan ism, nihoyat sahnadan tushdi. O‘n yildan ortiq vaqt davomida terma jamoaning markazida turgan Neymar ketar ekan, uning o‘rnida bo‘shliq qoladi. Ancelotti bu bo‘shliqni oddiy rotatsiya yoki navbatdagi iqtidor bilan to‘ldirib bo‘lmasligini ochiq tan oldi.
U CNN Esportes’ga bergan katta intervyusida holatni yashirmadi, yumshatmadi. Murabbiyning so‘zlari qisqa, aniq va og‘ir bo‘ldi: Neymar sifatiga ko‘ra terma jamoada bo‘lishga loyiq edi, lekin u qaytishni istamaydi. Ancelotti uni “g‘ayrioddiy va noyob” deb atadi va bunday futbolchi o‘rnini bosish amalda imkonsizligini ta’kidladi. Bu, aslida, Neymar davriga rasmiy nuqta qo‘yish edi.
Yangi Braziliya: yoshlarga tikilgan katta garov
Endi esa nigohlar butunlay boshqa tomonga burildi. Ancelotti va terma jamoa direktori Rodrigo Caetano keskin yangilanish yo‘lini tanladi. Maqsad bitta: 2030 yilgi jahon chempionatiga kelib, Braziliyani yana cho‘qqiga qaytaradigan yangi avlodni tayyorlash.
Bu shunchaki shior emas. So‘nggi tarkib chaqiruvlarida bu yo‘l allaqachon ko‘rinib turibdi: yillar davomida terma jamoaning suyagi bo‘lib kelgan tajribali futbolchilar chetga surilmoqda, o‘rniga o‘smirlar, mahalliy chempionatda porlayotgan yangi yulduzlar chaqirilmoqda. Braziliya endi kechagi kun natijalariga emas, ertangi kun salohiyatiga o‘ynayapti.
Ancelotti yaqin to‘rt yil uchun rejasini aniq chizib berdi. Uningcha, asosiy e’tibor 2004, 2005, 2006 yillarda tug‘ilgan futbolchilarga qaratilishi kerak. Hatto 2008 yilda tug‘ilgan, hali katta futbolda to‘liq ko‘rinmayotgan, ammo katta salohiyatga ega bo‘lgan yigitlar ham murabbiyning daftarida. Murabbiy ularning yoshini, bosimga chidamliligini inobatga olish zarurligini aytar ekan, baribir ustuvor yo‘nalish aniq: endi navbat yoshlarniki.
U baribir tajribani ham inkor etmadi – 36-37 yoshda ham yuqori darajada o‘ynash mumkinligini eslatdi. Lekin bugungi kun talabi boshqa: Braziliya endi kelajakni qurmoqda.
Neymar davridan keyingi Braziliya: endi jamoa birinchi o‘rinda
Neymar yillar davomida terma jamoaning qutqaruvchisi sifatida ko‘rildi. Murabbiylar, muxlislar, hatto raqiblar ham ko‘pincha bitta narsani bilardi: agar Neymar ketsa, Braziliya ham ketadi. Ana shu haddan tashqari bog‘liqlik ko‘p tanqid qilindi.
Ancelotti bu zanjirni uzmoqchi. Uning konsepsiyasi sodda, lekin zamonaviy futbol talabi bilan uyg‘un: endi yulduz emas, jamoa markazda turadi. Albatta, u katta individual mahoratning ahamiyatini inkor qilmaydi – bunday futbolchi bo‘lsa, g‘alaba ehtimoli oshadi. Lekin u bir narsani qat’iy aytdi: bugungi futbol jamoaviy o‘yinsiz yashamaydi. Kimki faqat bir superyulduzga tayanadi, uzoqqa bormaydi.
Shu maqsadda Ancelotti yoshlarni qat’iy, lekin ijodkorlikka yo‘l qo‘yadigan tizimga singdirmoqchi. Braziliya yuqori pressing, intensivlik, tezkor qarorlar talab qiladigan zamonaviy o‘yin ritmiga moslashishi kerak. Endi individual dribling emas, umumiy mexanizm tezligi hal qiluvchi omilga aylanadi.
Bu yangi falsafa qog‘ozda emas, maydonda sinovdan o‘tadi. Eng yaqin o‘rtoqlik uchrashuvlarida – Australia va India’ga qarshi bahslarda – bir qator futbolchilar ilk bor terma jamoa formasini kiyishi kutilmoqda. Murabbiy shtabi ularni nafaqat bugun uchun, balki uzoq muddatli loyiha nuqtayi nazaridan baholaydi.
Og‘riqli xotira va majburiy qayta qurish
Bu keskin burilish tasodifiy emas. Oxirgi jahon chempionatidagi muvaffaqiyatsizlik hali ham federatsiya va muxlislar ongida og‘riqli iz qoldirgan. Braziliya kutilganidan ancha erta, umidlarni oqlamagan holda musobaqani tark etdi. Shu zarba butun tizimni qayta ko‘rib chiqishga majbur qildi.
Ancelotti bu borada ham ochiq gapirdi. U o‘tgan sikl xatolarini tan olgan holda, endi asosiy vazifa – javobgarlik va o‘sish madaniyatini yaratish ekanini urg‘uladi. O‘rtoqlik uchrashuvlari endi shunchaki kalendarni to‘ldiradigan o‘yin emas, yangi poydevorning ilk g‘ishtlari sifatida ko‘rilmoqda. Har bir daqiqa, har bir sinov – kim Braziliya terma jamoasi darajasiga mos, kim esa yo‘q, degan savolga javob bo‘ladi.
Ancelotti so‘zining yakunida o‘tgan mundialni “xafsalani pir qilgan” deb atadi, lekin ortga qarab o‘tirishdan foyda yo‘qligini aytdi. Uning nazarida, vaqt hali bor – yangi avlodni to‘liq tayyorlash, ularga maydon va mas’uliyat berish uchun.
U bitta fikrni alohida urg‘uladi: Braziliya har doim dunyoning eng kuchli terma jamoalari qatorida bo‘lishi kerak. Savol esa endi boshqacha – Neymar sahnadan ketgan paytda, bu sharafli yukni kim ko‘taradi?
