Arbeloa «Fulham»ga Palaciosni olib kelmoqchi
Alvaro Arbeloa «Fulham»dagi ilk transferlarida eski uyidan uzoqlashmayapti. U yana «Real Madrid» akademiyasiga yuzlandi va bu safar diqqat markazida – Cesar Palacios.
Ispan nashri AS xabariga ko‘ra, Arbeloa allaqachon klub rahbariyatidan «Castilla»ning hujumkor yarim himoyachisi bo‘yicha imkoniyatlarni o‘rganishni so‘ragan. London klubi uchun yangi davr boshlanmoqda, murabbiy esa tarkibni aynan o‘zi yaxshi biladigan, ishonadigan yigitlar atrofida qurmoqchi.
Palacios – Bernabeudan chiqishga tayyor
Palacios yozgi tayyorgarlikni «Real Madrid»ning asosiy jamoasi bilan boshladi, lekin Valdebebasda hamma ham uni kelasi mavsum «Santiago Bernabeu»da qoladi, deb o‘ylamayapti. Reja boshqacha: muntazam o‘yin amaliyoti uchun boshqa manzil topish.
Yoz boshida 21 yoshli futbolchi «Como» bilan og‘zaki kelishuvga ham erishgan edi. O‘yinchi va uning vakillari transfer deyarli yakunlangani, faqat imzo qolganini o‘ylashgan. Oxir-oqibat, bitim qog‘ozga tushmasdan turib barbod bo‘ldi. Shartnomalar imzolanmadi, yo‘llar ajraldi.
Shundan keyin Palacios bozorida yana harakat boshlandi. Unga «FC Porto» va «Osasuna» qiziqish bildirdi, lekin bu klublarning birortasi muzokaralarni hal qiluvchi bosqichga olib chiqa olmadi. Takliflar bor, ammo aniq yo‘l yo‘q.
Natijada futbolchi yana Valdebebasga qaytdi. U hozir «Real Madrid» rahbariyati bilan birga keyngi qadami haqida o‘ylab, variantlarni sinchiklab tahlil qilmoqda.
Murabbiy va shogird: Angliyadagi ehtimoliy qayta uchrashuv
Palacios – Arbeloa uchun begona emas. Aksincha, u murabbiy nazarida shakllangan o‘yinchilardan biri. Arbeloa uni «Castilla»da ham, «Real Madrid» asosiy jamoasida ham boshqargan.
Yanvar oyida aynan Arbeloa 21 yoshli yarim himoyachiga «Real Madrid» safida katta futbolga yo‘l ochib bergan edi. Palacios shu mavsumda asosiy jamoada yettita o‘yin o‘tkazishga ulgurgan. Bu raqam ko‘p emas, lekin murabbiy uchun eng muhim narsa – o‘yinchining xarakteri va potentsialini ichdan bilishi.
Palaciosning shartnomasi 2027 yilgacha amal qiladi. «Real Madrid»ning yulduzlar bilan to‘la tarkibini inobatga olsak, unga muntazam daqiqalar va’da qilish qiyin. Shuning uchun ham klub atrofida uning ketishi deyarli tabiiy jarayon sifatida ko‘rilmoqda. Qog‘ozda uzoq muddatli shartnoma, amalda esa o‘yin amaliyoti uchun boshqa manzil izlash.
Shu fon’da Arbeloa «Fulham» rahbariyatidan ishni tezlashtirishni so‘ramoqda. U Palaciosni Premyer-ligaga olib kelishni istaydi. London – yangi sahna, eski murabbiy, yangi sinov.
«Fulham» uchun Madrid yo‘li: Gonzalo va Mastantuono ham ro‘yxatda
Palacios – Arbeloaning «Real Madrid»dan kuzatayotgan yagona nomzodi emas. U «Fulham» skautlariga Gonzalo Garcia va Franco Mastantuono bo‘yicha ham diqqatni oshirishni topshirgan. Yangi murabbiy London klubini o‘zi yaxshi biladigan, ishonchli yoshlar bilan boyitmoqchi.
Biroq bu yerda yana bir muhim figura paydo bo‘ladi – Jose Mourinho. U Arbeloaning «Real Madrid»dagi o‘rnini egalladi va hozircha shoshilmayapti. Mourinho yozgi tayyorgarlik davomida aynan shu yosh futbolchilarni yaqindan ko‘rishni, ularning imkoniyatini o‘z ko‘zi bilan baholashni rejalashtirgan. Keyin qaror bo‘ladi: kim qoladi, kim ketadi.
Demak, «Fulham» va Arbeloa uchun bu poyga vaqtga qarshi kurashga aylanmoqda. Madrid yoshlari Premyer-ligaga yo‘l oladimi yoki Mourinho qo‘l ostida o‘z imkoniyatini yana bir bor sinab ko‘radimi? Shu savol hozircha ochiq qolmoqda.
