Argentina va Ispaniya: Finalda g‘alaba yoki yurak?
Argentina yana bir bor charchamaydigan xarakterini ko‘rsatdi. Angliyaga qarshi yarim final ham xuddi shunday ssenariy bo‘yicha ketdi: zarba yeb, yiqildi, lekin baribir o‘rnidan turdi. Yakunda hisob 2:1, final yo‘llanmasi esa Lionel Messi va Lautaro Martínez qo‘lida.
Gordonning goli Argentina uchun sovuq dush bo‘ldi. Angliya ustunlikni qo‘lga olgach, o‘yin bir lahza ularning qo‘lidan sirg‘alib ketayotgandek ko‘rindi. Lekin bu jamoa qanchalik ko‘p zarba yesa, shunchalik xavfli bo‘lishini dunyo allaqachon biladi.
Messi yana sahnada. Yana boshqaruv pultida. Uning nozik pasidan so‘ng 85-daqiqada Enzo Fernández hisobni tenglashtirdi – umidsizlikka botayotgan Argentina birdan uyg‘ondi. Angliya orqaga chekindi, himoya chizig‘ida taraddud paydo bo‘ldi.
Bosim oxiri o‘z so‘zini aytdi. Messi ikkinchi marotaba bo‘shliqni topdi, yana uzatma, yana jarima maydoni ichida bo‘sh qolgan sherik. Bu safar – Lautaro. “El Toro” zarbani shunday bosh bilan yo‘lladiki, darvozabonning ham, himoyachilarning ham imkoniyati yo‘q edi. To‘p to‘rga kirgan zahoti Inter yulduzi ko‘z yoshlarini tiya olmadi. Bu nafaqat g‘alaba goli, balki uning milliy jamoa tarixidagi eng og‘ir, eng shirin zarbalaridan biri bo‘lib qoldi.
Shu tariqa, Argentina finalga chiqdi. Yakshanba kuni East Rutherforddagi hal qiluvchi bahsda raqib – Ispaniya, Yevropa chempioni. Bir tomonda amaldagi jahon chempioni, boshqa tomonda esa o‘z tizimi va g‘alaba madaniyatini mukammal darajaga yetkazgan ispanlar. Luis de la Fuente jamoasi turnir davomida sovuqqon, tartibli, deyarli titramasdan o‘ynadi. Ularning o‘yini ortida yillar davomida qurilgan tizim, mayda detallarigacha ishlangan g‘olib mentaliteti yotibdi.
Argentina esa boshqa yo‘lni tanlagan. Bu yo‘l – xarakter, o‘jarlik va Messi atrofida shakllangan g‘alaba odati. Yana bir epik qaytish, yana bir kechikkan zarba, yana bir dramatik ssenariy. Finalda bu ikki falsafa to‘qnash keladi: tizimga tayanadigan Ispaniya va ruhga suyanadigan Argentina.
Shu paytda Fransiya ham jim emas. U yerda Zinedine Zidane nomi atrofida kutish, pichirlashlar kuchayib bormoqda. Milliy jamoa keyingi bosqichga o‘tishda aynan uni bosh murabbiy sifatida ko‘rishni xohlayotganlar ko‘p. Lekin bugun sahna markazida boshqa qahramonlar: Messi, Lautaro va Ispaniya bilan bo‘ladigan hal qiluvchi to‘qnashuv.
East Rutherforddagi yakshanba kechasi bitta savolga javob beradi: tizim g‘alaba qozonadimi yoki yurak?
