Arsenal va Pro Ref o‘rtasidagi penalti bahsi
Arsenal yakshanba kuni Sunderland ustidan qozonilgan g‘alabadan keyin ham o‘zini to‘liq g‘olibdek his qilmadi. Maydondagi eng bahsli lahza – Ezri Konsa ishtirokidagi penalti – endi klub va hakamlar organi o‘rtasidagi rasmiy suhbat mavzusiga aylanadi.
London klubi yaqin kunlarda professional hakamlar organi Pro Ref bilan bog‘lanadi. Maqsad bitta: Sunderlandga penalti berilishiga olib kelgan epizod bo‘yicha aniq tushuntirish olish.
Bahs markazida – Konsa va Ballard to‘qnashuvi
Vaziyat jarima maydoni ichida, Ezri Konsa va Sunderland sardori Dan Ballard o‘rtasidagi jismoniy kurash paytida yuz berdi. Hakam John Brooks Konsani ortiqcha ushlashda ayblab, penalti nuqtasini ko‘rsatdi.
VAR ham qarorni qayta ko‘rib chiqib, uni tasdiqladi. Premier League Match Centre sahifasida e’lon qilingan rasmiy bayonotda: Konsaning Ballardga nisbatan ushlash qoidabuzarligi uchun penalti belgilangani va bu qaror VAR tomonidan tekshirib, ma’qullangani qayd etildi.
Arsenal esa bu epizodga boshqacha qaraydi. Klub rahbariyati yirik hakamlik qarorlari natijalarga ta’sir ko‘rstatishini istamayapti va Brooks qanday mantiq bilan shunday xulosaga kelganini bilmoqchi.
Arteta: “Men buni 20 marta ko‘rdim, baribir tushunmadim”
Uchrashuvdan so‘ng Mikel Arteta g‘azabini yashirmadi. Uningcha, bu darajadagi o‘yin uchun bunday penalti – qabul qilib bo‘lmaydigan xato.
Murabbiyning so‘zlari keskin yangradi:
“Bu darajada bunday bo‘lishi qabul qilib bo‘lmaydi. Men vaziyatni 20 marta ko‘rdim, lekin u yerda qanday qilib penalti ko‘rish mumkinligini tushunolmadim. VAR qanday aralashishi kerak bo‘lganini ham tushunmayapman. Nima deb o‘ylashni bilmayman. Shunchalik chiroyli o‘yindan so‘ng biz mana shuni muhokama qilishimiz meni xafa qiladi. Chunki bu butun mavsum yo‘nalishini o‘zgartirishi, chempionlikdan mahrum qilishi mumkin. Bu darajada, biz qo‘ygan mehnat bilan, bunday holat yuz bermasligi kerak.”
Artetaning ohangida nafaqat g‘azab, balki chuqur hafsalasi pir bo‘lgan murabbiyning alamini sezish qiyin emas. U natijadan ko‘ra, tizimga bo‘lgan ishonch tebranayotganini urg‘uladi.
Ekspertlar ham norozi: “Bu penalti emas, aksincha – jarima zarbasi”
BBCning “Match of the Day” dasturida o‘tirgan tahlilchilar ham hakam qarorini qo‘llab-quvvatlamadi. Ashley Williams va Thomas Frank epizodda aksincha Arsenal foydasiga standart belgilanishi kerakligini aytishdi.
Williams keskin fikr bildirdi: hakam vaziyatni butunlay noto‘g‘ri baholaganini ta’kidladi. Uning ta’rificha, Ballardning harakati “judo” uslubidagi mukammal “hip toss”ga o‘xshab ketgan, ya’ni Konsaning o‘zi yiqitilgandek manzara.
Ularning fikri Artetaning g‘azabini yanada oqlayotgandek. Maydondagi qaror – penalti, VAR tasdig‘i, lekin studiyadagi sobiq futbolchilar nazarida bu epizod penalti darajasiga yetmaydi, hatto aksincha, Arsenal foydasiga jarima zarbasi bo‘lishi kerak edi.
Arsenal nimani istayapti?
Klubning asosiy talabi – izoh va aniqlik. London jamoasi Pro Ref bilan muloqot orqali shunday vaziyatlarda qo‘llanadigan standartlar, ushlash va kurash chog‘ida qaysi chiziqdan o‘tish “penalti”ga aylanishini aniq bilishni xohlaydi.
Gap faqat Sunderlandga berilgan bitta penalti haqida emas. Gap chempionlik uchun kurashayotgan jamoa mavsum taqdirini hal qilishi mumkin bo‘lgan bunday qarorlar oldida o‘zini himoyasiz his qilmasligi haqida ketmoqda.
Endi navbat Pro Refda. Ular tushuntirish beradimi? Yoki bu penalti mavsum yakunida Arsenal uchun og‘riqli eslanadigan burilish nuqtasiga aylanadimi?
