Juventus darvozabon izlayapti: De Gea yoki Martinez?
Yozgi bozor endi qiziy boshladi, “Juventus” esa eng nozik pozitsiyalardan biriga – darvozaga qayta qo‘l urmoqda. Klub “Calciomercato” xabariga ko‘ra, asosiy nishon – “Aston Villa” yulduzi Emiliano Martinez. Ammo Turin grandining ichkarisida bitta haqiqatni yaxshi tushunishadi: bu darajadagi transfer hech qachon kafolat emas.
Shu bois rejadagi “B varianti” allaqachon chizib qo‘yilgan. U ham bo‘lsa, “Fiorentina” darvozaboni David De Gea.
De Gea – qaytgan yulduz
35 yosh. Bir paytlar erkin agent sifatida bozor chetida qolib ketgan, faoliyati so‘nayotgandek ko‘ringan darvozabon. Lekin o‘tgan mavsum “Fiorentina”da u eski darajasini eslatdi.
- 37 ta Serie A o‘yini.
- 10 ta “quruq” o‘yin.
- Oldingi mavsumdagi 11 ta “quruq” o‘yindan keyin barqarorlikni saqlab qoldi.
Raqamlar ham De Gea hanuz ishonchli ekanini ko‘rsatadi. O‘tgan mavsumdagi “gollarni saqlab qolish” ko‘rsatkichi +1.06 bo‘ldi – bundan avvalgi mavsumdagi 0.59 dan ancha yuqori. Bu shunchaki statistika emas, bu uning hali ham ochkolarni saqlab qoladigan, jamoasini chiziqda sudrab chiqara oladigan darvozabon ekanidan dalolat.
“Fiorentina” xavfli hududda aylangan pallalarda De Gea aynan shunday qutqaruvchi rolini bajardi. Klub “quyoshga juda yaqin uchib” ketayotgandek bo‘lganida, aynan u bir nechta hal qiluvchi seyvlar bilan jamoani pastga qulamaslikka majbur qildi.
Shu sababdan “Juventus” uni jiddiy variant sifatida ko‘rayotgani bejiz emas. Klub rahbariyati va Luciano Spalletti uchun tajriba, xarakter va liderlik – birinchi o‘rindagi talablar. De Gea bu uchalasi bo‘yicha ham belgi qo‘yib o‘tishi mumkin bo‘lgan futbolchi.
Di Gregorio uchun raqobat, klub uchun sinov
“Juventus”ning hozirgi rejasi oddiy: Michel Di Gregorio uchun sog‘lom, yuqori darajadagi raqobat yaratish. Martinez shu maqsad uchun idealga yaqin nomzod sifatida ko‘rilmoqda. Lekin agar bu transfer amalga oshmasa, De Gea sahnaga chiqishi mumkin.
Savol esa boshqa yerda: “Juventus” yana bir bor qisqa muddatli yechim ortidan quvyaptimi?
De Gea keladigan bo‘lsa, tajriba, barqarorlik va kiyinish xonasida og‘ir so‘zga ega shaxs sifatida darhol foyda keltirishi aniq. U “Old Lady” darvozasi oldida muammosiz bir-ikki mavsum turib bera oladi. Lekin bu klubning uzoq muddatli loyihasini oldinga siljitadimi?
So‘nggi yillarda Turin grandining transfer siyosati aynan shu nuqtada tanqid qilinib kelmoqda. Yoshi o‘tib qolgan, tayyor yulduzlar, qisqa muddatli yechimlar, darhol natija berishi kutiladigan, lekin ertaga nima bo‘lishi o‘ylab ham ko‘rilmaydigan xaridlar. Natija esa ko‘rinib turibdi: tarkib sekin-asta eskirdi, jamoa yangilanmay qoldi, maydondagi dinamika yo‘qoldi.
Bozor yoshlarga to‘la, “Juve” esa yana veteranga qarayaptimi?
Yevropa bozorida hozir yosh, och, o‘sishga tayyor darvozabonlar yetarli. Ular hali nom qozonmagan bo‘lishi mumkin, lekin salohiyatlari ulkan. Ana shunday darvozabonni olib kelish – Di Gregorio bilan haqiqiy kurash yaratish, raqobat orqali ikkala darvozabonni ham yuqoriga ko‘tarish, vaqti kelganda esa yangi birinchi raqamli posbonni qo‘lga kiritish demak.
“Juventus” uchun esa bu – kelajakni qurish imkoniyati.
De Gea bu yerda boshqa rolni taklif qiladi. U hozirgi holatda ishonchli variant, xavfsiz tanlov. Lekin u bilan kelajakni 5–7 yilga oldindan rejalashtirib bo‘lmaydi. Bugun yordam beradi, ertaga esa yana o‘sha savol paydo bo‘ladi: endi kim?
Turin klubi yillardan beri aynan shu doiradan chiqa olmayapti. Yoshi katta futbolchilar, qisqa muddatli yechimlar, keyin esa yana qayta qurish haqida gaplar.
Qaror va yo‘l ajrashi
Agar Martinez transferi barbod bo‘lsa, De Gea nomi yana kuchliroq tilga olinadi. Tajriba, katta sahnadagi yillar, “Fiorentina”dagi qayta tug‘ilish – bularning bari uni jiddiy nomzodga aylantiradi.
Lekin bu savol baribir stol ustida qoladi: “Juventus” nihoyat kelajakni quradimi yoki yana bir bor o‘zini veteranlar yelkalariga tashlaydimi?
De Gea “Allianz Stadium”ga kelsa, darvozani ishonchli qo‘riqlashi mumkin. Lekin “Old Lady”ning katta loyihasini haqiqatan ham oldinga siljitadigan darvozabon – hali o‘sayotgan, hali cho‘qqiga chiqmagan, lekin aynan shu klub bilan o‘sha cho‘qqiga chiqishga tayyor bo‘lgan yigit bo‘lishi kerak emasmi?
